Hailey Baldwin Cu Thitumh Nak Puai Caah Timh Tuahnak A Ngei Cang Nain Justin Bieber Nih A Ni A Thawn Than

Justin Bieber le Hailey Baldwin hna cu nikum September thla ah khan an mah pahnih hnatlak nak in a thli tein thitumh minthut nak an rak ngei cang nain Hailey Baldwin nih kaphnih chungkhar hna he mipi hmai ah thitumh nak puai tuah a duh than caah ni tlawmpal cu an puai ding kong ah timhlamh nak kha an ngei. An puai tuah nak ding kong ah Hailey Baldwin cu lung tho ngai in a um i, a maw tuan tu ding hna zong a chimh dih cang hna tiah thawngpang a chuak nain Justin lei kap cun a hawikom tha tuk hmanh nih mah kong hi an thei rih lo pin ah a mah Justin hmur kaa zong in zeihmanh a chuak rih loh.

A hlan ah an puai tuah nak kong ah Justin nih Selena siizung a um lio ah cun a lung nuamh lo nak ding mi tuah cu ka duh lo, siizung in a chuah hlan lo puai kan tuah lai lo a ti caah a hnu ah a rak thawn. Justin nih interview ah Selena cu ka dawt peng ko lai i, a zawn ka ruah peng ko lai a timi hi hman ngai dawh a si ko. Selena cu siizung in a chuah hnu ah a hlan nak in ai dawh deuh pin ah puitling ngai in mipi hmai ah a van langh than tik ah cun Hailey Baldwin nih an puai sawm nak ca cu a hawi le sin ah a phot dih cang hna. TMZ media nih a langhter ning ah cun an puai ni ding hi Febuary 28 a si i, buak tlak in an sawm ding mi hna hi minung 300 an si tiah theih a si.

Sawmnak ca a ngah mi hna chung ah Kylie Jenner, Travis Scott, Christ Brown, Drake le Odell Beckham Jr hna pin ah Kylie hawi kom tha tuk a si mi hna Kendall Jenner le Gigi Hadid hna zong an i tel tiah thawngpang a chuak. Thlakhat ai duh ah sawm an si tik ah hin ready ngai in an um cio ko men lai. Asinain tlawmpal ah Justin nih puai ni a thawn than tiah thawngpang a chuak than, a thawn nak a sullam cu a biapi in a sawm mi hna an i tel kho lai loh tihi a si.

Vawlei cung hlasak thiam minthang pakhat i a puai ah a ho dah manh lo in a um hnga, a chungkhar le hawikom hna zong timh lamh nak an ngei dih cang ko. Ai tel kho lo ding um hmanh hna seh law, a ho hmanh nih thitumh nak puai tuah nak ding ni an khiah cang mi cu sawm mi a ra lai loh ti ruang ah a ni thawn a um bal rih loh. Show puai tuah a si tung lo. Justin nih a mah lung tho tein thit ding ah a hal mi Hailey Baldwin he an puai tuah nak ni kong ah a ni a thawn hi voi thum a si cang tiah TMZ media nih a langhter.

Justin thil tuah mi kong ah Hailey Baldwin zong a lung fiang ve ti loh. Justin nih an puai ni a thawn lengmang mi hi midang nih an ruah ning bantuk in Selena a philh khawh lo ruang ah maw a si hnga, a si khawh ah cun Selena sin i kir than ai timh hna a si hnga maw, si lo le thil dang pakhat khat ruang ah dah a si hnga, puai hna hi an tuah kho tak tak hnga maw ti in a um mi an tam ngai.