Minung Kan Ngandamnak Ding Caah Kawpi A That Ning Hi Rak Rel Ve Hmanh

Laimi zong nih fawi tein kan cin khawhmi le kan ei din khawhmi Kawpi nih hin minung kan caah zei tluk in dah tthathnemnak a rak chuahter timi hi rak rel ve hmanh. Kawpi le Paan Kawpi hna nih hin minung kan paw chungah a ummi kan ril cancer chuahnak a zor ter khawh tiah scientist pawl nih cun an chim. Kawpi phun paoh paoh a simi hna hi minung kan ril damnak a chuahter timi cu zumh lonak neih ding zong a um bak lo i mi vialte nih a ttha tiah an pomnak le an cohlannak caan zong a sau ko cang. A si nain ril cancer chuahnak tiang a kham khawh timi kong belte cu a hlan ah cun mi tampi nih kan rak thei lem lo.

Minung nih kan ei dinmi tisik anhnah hna kan paw chung i a maan tik ah hin cancer zawt a do kho tu Chemical thilri pawl a chuahter tawn tiah Francis Crick Institute i hlathlainak a tuah tu hna nih cun an chim. Tisik anhnah hi zei ruangah dah tampi kan ei piak a herh timi kong he pehtlai in Cancer Research UK zong nih tampi an ttial ve.

Tisik anhnah einak nih minung kan ril caah zei bantuk tthathnemnak dah a chuahter timi kong hi Francis Crick Institute nih biatak tein hlathlainak an tuahmi a si i mah ti an tuahnak ah cun zu(mouse) hmang in an tuah bantuk in operation room chung i minung ril bantuk in an tuahmi hna he zong in an tuah tawn.

Kan rilpi nih hin rian a ttuanmi tampi hna chungah hin pakhat te a um vemi cu kan takvun aa thlen bantuk in kan rilpi a tlaang vun zong hi aa rak thleng tawn ve. Minung hi rul bantuk in kan vun aa thleng tawn ti tik ah hin cheukhat cu kan khuaruahhhar ngai tawn. A si nain kan kut le kan ke vun te hna aa thlen ning khi rul nih a phaw a thlen bantuk he aa khat bakmi si ko.

Mah ti i kan ril tlaang vun aa thlennak ah hin Kawpi phun a simi hna einak nih a chuah termi dat hi a rak biapi tukmi si ve i um lo a ngah bak lomi a si fawn tiah sii kongkau ttial tu Immunity journal nih chun an ttial. Cu tluk in minung kan ngandamnak caah a tthami Kawpi le Brocco tiah auhmi Paan Kawpi hna hi zei tin dah kan ei piak ah a tthat bik tiah cun kan chumh tik ah hin hmin tuk loin chumh piak ah ttha.

Cun Paan Kawpi khi kan kio tik ah hmin tuk le nem tuk loin a hringnawn (a singcaw) phun in kio i ei piak ah a ttha bik. Sui ngun chawva zei tluk tam nei ko hmanh usi law kan ngan dam lo ah cun santlaihnak a rak um lo bantuk in kan ril damnak ding caah a ttha tukmi le kan pawngkam zongah fawi tein kan cawk kan ei khawhmi Kawpi hi tam piin ei piak khawh i zuam hna usih.