Sianginn Peh Khawh Nak Ding Ah Rian A Sok Mi Tang 5 Pate

Cheukhat inn chungkhar cu an rum tuk nak ah an tefa chan 7 tiang a nguh ding in an rum hna nain cheukhat inn chungkhar cu nikhat tuan, nikhat ei in an paw ai cawm mi hna zong an um ve. Cu lak ah cheukhat cu nikhat tuan nikhat ei ding hmanh ai hmuh lo mi zong um a si ve thiam. Ngakchiat lio tein fim nak cawn ding timi hi theih cio a si ko nain fim nak cawn nak ding ah ngakchia rian a tuan mi le har sa tak tak in fim thiam nak a cawng mi hna hi an um hna.

Cu chung ah tang 5 pate Kervy James Villarejo zong ai tel ve. Kervy cu Philippine ram thlang lei,General Santos khua i, Jose Catolico Sr.Elementary School ah a kai mi sianghngakchia a si. Kervy nih cun saupi fim thiam nak a cawn khawh nak ding ah zarh chiar khar caan paoh ah rian ka tuan lai tiah a ruah. Cu tik ah Kervy cu Charter Ping An Insurance Corporation Company ah ral tha ngai in a va kal i, zung thianh rian a um si ah cun tuan a duh nak kong le an pek zet phaisa paoh a cohlan nak ding kong kha a va chim.

Zung rian tuan tu hna nih cun Kervy ral that ning dan cu an khuaruah a har ngai ngai. Manager nih ngakchia rian upadi ning in ngakchia pakhat rian pek lo ding a si kha a theih ko. Asinain a duhnak tlin ter nak ding caah interview hmanh upat nak he a tuah hnu ah rian tuan ding in a cohlan.