Bawipa cu minung lungdongh hnu ah aa phuang tawn

“Bawipa cu minung lungdongh hnu ah aa phuang tawn” tiah kan ruah tawn, a chim zong kan chim tawn. Kan lungdongh hlan ah le lungdongh hnu ah si loin amah aa bochanmi hna cungah le amah a zummi hna cungah cun lungdongh lo zong ah aa phuang ko. Kan lung dongh theng khi Bawipa nih a hngak lo. Amah kan zumh i kan i bochan tu khi a duhmi le a hngahmi tu cu a si deuh. Kan caah a ṭha bik in le a sunparnak caah rian a ṭuan zungzaltu a si.

Kan lunglawmhnak siseh, kan harsatnak le lungretheihnak vialte hi Bawipa nih a hngalh dih. Bawipa hnatlaknak loin Satan nih hin kan cungah zeihmanh a tuah kho lo, tuahnak nawl zong a ngei lo. Job nunnak zoh tikah a fiang ngaingai. Kan tonmi vialte hi Bawipa nih a theih ko, ti hi kan hngalh khawh le kan cohlan thiam i, kan tonmi vialte hi Bawipa hmaika ah kan chuahpi ahcun Bawipa nih kan thilrit vialte kha a kan chawn, a kan lakpiak, a kan bawmh, tei khawhnak a kan pek.

A fale hna hi kan i hnamhnaw tuk tawn, kan lung a rang tuk tawn i Bawipa hi a khulnuarmi ah kan ruah tawn i a si. Amah caante ah rian a ṭuanmi Pathian a si. A khuakhannak le program a tlin hlan ah cun au-len zong ah aa ranh hlei lo, a khuakhannak caan a phak tik le a tlin tikah cun, kham len zong ah ahohmanh nih khamh khawh le donh khawh a si lo.

A fale kan caah hin kanmah i kan i ruahmi nakṭha deuh in khua a kan khanpiak zungzaltu a si. Kan ca i a ṭha bik a hngaltu le kan caah a ṭha bik in khua a kan khaanpiak zungzaltu cu Bawipa a si.
Credit: Abraham Ram Lian Khar