Na tuah hlan ah ruat hmasat

Laimi tampi cu keimah thawkin mi chimh chinnak in lungrang ngaiin thil tuah kan hman caah tutan cu kan tuah hlan ah fakpi khuaruah hnuah biachahnak tuah u sihlaw kan ngamh ko ahcun intuar khawh i zuam hna u sih.

Hlan lioah cun Australia le USA hna hi cu kan hnathlam lawngin kan theih nain Pathian lamhruainak in kan mit nih a hmuh i kan ke nih a lamh ve cang. Chan aa thlen lengmang tikah phaisa a um ko ah hin zei poah hi Globalization timi chan a sinak hi a lang chin lengmang.

Hlan lio deuh ah cun Japan le Singapore le Korea hna kha kal a rak lar nain tu ah cun Australia kal a hung lar tthan cang. A lar ka cu si kaw a harnak chimh len zongah santlainak a um lo. Damh khawh ti lomi cancer zawtnak bantukin a si. A harnak a tep cangmi hna nih chimh ahcun nahchuahnak( ra hlah seh ti a ka duh caah a si) ti phun i in hawikom le chungkhat zong chawnh duhlo kan tam cang.

Kawlram in ratnak $3500 le Australia ah General English kainak le Health Insurrance caah $7500 a zapi in $11000 tluk dih in kum hnih le cheu Australia ah kan um hi zeidah kan kai mi a si ti cun, chimh zong ningzak si nain chimh caan a si caah chimh ko ninglaw $11000 dih in kan rathnawh mi cu thla 6 mirang ca cawn le kumhnih chung rawlchum cawn, khual zohkhenhning le lakphakti serning, hngakchia zohkhenhning le mawtaw remh cawn hi a tllangpi in a si ko. Cheukhat nih cun Australia ah sianginn kai ah an kal tiah ttih ngai kan si. Kan kaimi hi Institute a si i a tlangtar hmanhah Vocational Educational and Training Sector ti a si.

University ah kai khawhnak lam hi a har bak mi a si. University ah kainak ding ahcun IELTS listening 6.5, writing 6.5, speaking 6.5 hmuh a hau caah hmuh a fawi mi a si lo. Miphun dang hmanh nih voi 35 an phit nain an sungh peng tiah Saya Sang Hre nih zahan ah a chim. Cucaah scholarship ngahnak ding le Uni kainak lam he cun kan i hlat tuk tinak a si. Cu lakah International students pawl cu mirum ah ruah cio cu si hna kaw, train, tram le bus citnak ticket(myki) hmanh full fare in an kan tuahpiak hoi ai. Sifak chungkhar docawi chawm in a ra mi kan si zong theih hna hlah kaw, sifak ngang in mirum cazin ah telh bantuk kan si.

PR soknak kongkau ah thil phun 10 tluk hi an tthen mi a um i cu chungah tlinh khawhnak lam pakhat hmanh kan ngei lo tluk a si. PR hmuhnak caah cun Nursing hi first priority a si nain Diploma sawh hmanhah a man a sang tuk pinah Bachelor caah caanttha a um deuh hoi. PR hmuh har kaw, kir tengteng kan hauh caah kan cawnmi nih Laitlang ah zei tiang thathnemnak a kan pek lai timi kha kan kainak institute le course kha tuaktan ngai a hau. Cawnmi thiam huaha lo, rian le ttuan kho huaha lo cun lungdongh a fawi te.

Australia rat hi thlauh a si bak lo. Nain na kalnak ding hmunhma kongkau hi theih i zuam ta law ti ka duh. Nan thachiatnak caah ka chimh zong silo, a hmanmi ka chimhmi a si caah tha i hrimnak tu ah hman i zuam. Ruahchannak sang tukin na rat sual ahcun lungdongh a fawite. Nain oversea(ramdang) a si caah i chirnak men in duh in kir khawh a si lo caah lungsau tein tuaktan hnuah biakhiahnak kha i tuah law ti hi kan duhpi ngai ve hna.

Rian hmuh a harnak le ttuan a harnak le nikhua caan a harnak cu ka rak ttial bal cang caah ka nawlh ti lai lo.

Note : PR pawl bantukin Students Visa pawl hi caantha ngeih ve u sihlaw harsa zongah thathu ti phu kan si ko. Nain nihnih te lawng riantuan caan kan ngeih caah part time nakin full time an duh hna caah rian hmuh hi a har. Cheukhat thlithup in ttuan khawh a si ko nain Company cungah aa ngat caah dawtnak tak a kan ngeihtu company lawngah tuan khawh a si nain tam tuk cu a kan cohlan kho ve lo. A lamhlat in a thatnak chimh.cu fawite nain a tak nun hi a har.

Salai Za Thawng
Melbourne
Australia