A Tu Hi Khrihfabu Chan Asiloah Velngeihnak Caan A Si. May 18/2019, Zarhte Ni

Kaapaunak: Atu lio online ah a lar ngaimi tampi lakah phun khat cu Penticostal pawl, Penticost Ni i a rung tummi Thiang Thlarau le a Riantuannak a zummi hna dohnak kong a si. Atu Khrihfabu chan ah, zumhnak (Doctrine), Kalning (Movement) hi a thlurpi in phun li ka hun langhter hmasa lai: Liberal or Ecumenical, Fundamental, Evangelical le Penticostal hna hi an si i atu lio i online in Thiang Thlarau Riantuannak le Thiang Thlarau laksawng a dotu hna hi Fundamental Extreme pawl an si hna. Khrihfabu Chan asiloah Velngeihnak Caan timi cu Penticost Ni (Lam. 2:1-4) in aa thawk i Mithiang Lawr Ni (Biat. 3) ah a dong te lai.

1. Lamkaltu Hna Chan le A Tu Chan Tiin Then Cu Phuahchom Theory A Si.

Lamkaltu hna kha Jesuh sinah kum thum leng nun cawng hna hmanh sehlaw Penticost Ni i Thiang Thlarau a rung tummi an co hlan ahcun Thawnnak an ngeih lo caah Jesuh cawnpiaknak an i nunpi kho lo, an hmang taktak kho lo. Cucaah Jesuh nih Thiang Thlarau Thawnnak nan co hnu lawngah kan fialmi hna rian lianngan cu nan tuan te lai a ti hna. (Joh. 14 in 16 tiang; Mtt. 28:18-20; Luka 24:44-52; Lam. 1:1-11; 2:1-42; Dal 3 in 19 tiang rel ding).

Lamkaltu hna le zultu 120 (Lam. 1:15) hna nih an comi Thiang Thlarau Thawnnak thawngin Penticost ni ah mit in hmuh khawhmi Khrihfabu (Visible Church) a lang. Cu Khrihfabu cu Thiang Thlarau nih a umpi asiloah a um hnawh cang. Zumtu lak ni (Rapture) tiang a umpi lai. Cu Thiang Thlarau cu Khrihfabu asiloah nihin zumtu hna nih kan herh bikmi a si. Lamkaltu hna chan in a tu chan tiang hi Khrihfabu chan asiloah Velngeihnak chan a si, then awk a tha lomi chan a si.

Thiang Thlarau Thawnnak timi hi Fundamental pawl nih cun zumtu chunglei thiantertu ca lawngah an ruah; lenglei i a thawnnak langhternak lei an duh lo. Cu lenglei i a langmi Thiang Thlarau Thawnnak ka timi ahcun, mizaw damnak, khuachia thawlnak, rul sivai teinak, mithi thaehternak le a dang khuaruahar thil a phun phun hna hi an si. Hi Thiang Thlarau Thawnnak thawngin a langmi pawl hi an duh lo caah a duh lomi hna sinah a lang ve lo; zeicaah tiah an zumh lo caah a si. Jesuh zong nih an zumh lonak ahcun khuaruahhar thil a tuah lo. (Mark 6:5, 6; 16:15-18).

2. Lamkaltu Hna An Thih Hnuah Thiang Thlarau Thawnnak In Khuaruahhar Thil Tuah A Um Ti Lo Timi Cawnpiaknak Hi Cawnpiaknak Dik Lo (Nal Profet Cawnpiaknak) A Si. Mtt(. 24:3; 7:15; 1 Kor. 11:19; 2 Tim. 2:18; 1 Joh. 4:3).

Hi cawnpiaknak a dirpi hna nih an chim tawnmi cu, “Lamkaltu hna an thih hnu in Khrihfabu tuanbia chungah a lang ti lo; AD 1906-1912 hnu lawngah a lang than,” tihi a si. Hi hna nih an relmi Cauk chungah a um lo caah a si men lai, an rel lomi cauk tampi a um ti ve ti an hngalh a herh. Cun mi cheukhat cu an relmi ko zingah an duh lo caah a si tawn. Hi hna kong hi Thiang Thlarau nih Paul sinah a rak chim chung cang. “Kan biaknak phung hi a lenglei in an i tlaih lai, sihmanhsehlaw a chung i a ummi thawnnak taktak kha cu an duh lai lo, cu hna cu hrial i zuam hna. (II Tim. 3:5).

2 Timote 3:5-9 chung bia hi Baibal fianternak nih a chimning ahcun Izipt ram i Moses hmangin a langmi Pathian Thawnnak a dohtu Jannes le Jambres hna bantuk kha, tu chan ah an chuak ve lai i hrial hna a ti, (Exo. 7:11, 22). “Sihmanhsehlaw ka fale hna, nan nih cu Pathian ta nan si i nal profet hna kha nan tei cang hna; Zeicahtiah nan chung i a ummi Thlarau (Thiang Thlarau) kha vawlei mi hna a simi chung i a ummi thlarau nakin a thawng (thawng) deuh. (Joh. 4:4).

Thiang Thlarau Thawnnak a dohtu hna an cawnpiaknak a duh i a pompimi hna nan kong zong hi Thiang Thlarau nih Paul sinah a rak chim chung cang. “Nuhmei cheukhat cu Satan zulh awkah khan an i mer than cang.” (1 Tim. 5:15: Baibal Fianternak nih hihi cawnpiaknak dik lo zulh a chim duh tiah a ti). “Mi nih a dimmi cawnpiaknak kha zulh duh loin anmah duhmi cu an zulh caan kha a phan lai. Cun theih an duhmi lawng phuang dingin cawnpiaktu saya kha an caah an i lak te lai. Biatak ngaih duh loin hnu an chilh lai i a dik lomi tuanbia sawhsawh tu kha an ngaih duh lai. (2 Tim. 4:3, 4). Mah Cathiang nih a chim duhmi hi phun hnih thum in langhter khawh a si i a tu Thiang Thlarau Thawnnak aa bochanmi hna cawnpiaknak le cawlcanghnak a dohmi hna cawnpiaknak le cawnpiaktu hna a duhtu nanmah ca zongah tial a si ve.

Thiang Thlarau riantuannak le Thiang Thlarau Thawnnak a duh lomi hna hi mi uah, keimah tinak lungput a ngeimi an si tawn. Thiang Thlarau nih cun toidor nun a ngeimi hna sinah a thawnnak a langhter tawn. Cu uahnak in a khat in Thiang Thlarau Thawnnak a domi Fundamental pawl hmang in Mileem biaknak a thawnnak le camh le eih hna hmangin thlarau sual thawnnak nih a ukmi hna ram ah thawngthabia a karh bal lo. Khrihfa a si ciami ram i a hrinthan lomi hna caah cun Pathisn nih a hman ve ko hna. Sihmanhsehlaw Penticost Ni Thiang Thlarau Thawnnak aa bochanmi hna cu thlarau sual thawnnak nih a khuhmi ram ahcun khuaruahhar in a hman hna. Fundamental pawl nih an Sianginn i an cawnnak le anmah an i bochannak in an tuah khawh lomi kha Thiang Thlarau Thawnnak aa bochanmi hna hmangin Thiang Thlarau nih a tuah tikah nahchuahnak in an doh hna. Mit a ngeimi nih cun Vawlei pumpi hi zoh ulaw nan hmuh ko lai. Nan hmuh khawh lo ahcun vawlei thlarau thalo nih nan mit an huh hna caah a si ko lai, (2 Kor. 4:4).

3. Nihin Ah Pathian Nih Khuaruahhar Thil A Tuah Tilo Timi Cawnpiaknak A Palhnak

Nihin ah khuaruahhar thil tuah timi a um lo timi cawnpiaknak a palhnak hi phun tampi in langhter khawh asinain cauk tial asi lo caah tlawmpal te lawng ka langhter lai.

(1). Jesuh chim chung bia a palh tinak a si. (Luka 24:49; Lam. 1:8; Mark 16:16-18).

(2). Khuachia aa bochanmi hna hmanh nih khuaruahhar thil an tuah khawh lengmang lioah Thiang Thlarau Thawnnak aa bochanmi hna nih an tuah khawh lo ahcun Khuachia hnuzulhtu a tha deuh hnga. (Khuachia hnuzul hna nih an tuah bantukin tuah ve ding ka tinak cu a si lo).

(3). Khrihfabu umpitu Thiang Thlarau nih a thawnnak a langhter ti lo asi ahcun Khrihfabu nih Thawngthabia karhter rian kan tuan a herh tilo tinak a si hnga.

(4). Thiang Thlarau thawngin a langmi khuaruahhar thil pawl a um tilo timi a zumtu hna caah cun Khrihfabu chan a dih cang tinak a si.

(5). Thiang Thlarau Thawnnak in a langmi khuaruahhar thil hna hi nihin a um tilo timi cawnpiak hi a dik ahcun Baibal Thiang a palh tinak a si hnga. (Thiang Thlarau riantuannak le Thiang Thlarau Thawnnak a zum lomi hna caah cun Biakam Thar Cauk hna hi an hman dingmi a tlawm tuk; an duh lomi paoh paoh khi thlek usihlaw a pante lai).

(6). Thiang Thlarau Thawnnak thawngin a langmi khuaruahhar thil pawl a um tilo timi a cawnpiaktu hna nih an palhnak fianternak pakhat cu Thiang Thlarau Thawnnak thawngin Khuaruahhar thil a langh peng mi hi a si.

(7). Biakam Hlun Chan le Biakam Thar Chan I Riantuantu Pathian hi ai thleng lomi Pathian a si caah an palh.

Biadonghter chungnak: Thiang Thlarau riantuannak le Thawnnak a zumtu hna lakah cawnnak le thiamnak leiin bochan tlak kan pale tampi an um hna. Leh tlak loah an ruah caah an leh hna lo i a si kho men. Cun atu ka langhtermi hna hi a sullam a dangdang leiah an kawiter than te lai timi ka hngalh cia i an i thleng bal lai lo timi zong ka hngalh cia ko. Anmah hnuzul pawl nih cun asilo ningin nan al te lai timi zong ka hngalh cia ko. Noah chan lio ah khan Pathian Biathli a thei i a zumtu Noah te chungkhar caah cun thluachuah nganpi a si nain mi tam deuh pi nih cun an zum duh lo. Jesuh nih taksa in a nun lioah khan khuaruahhar tampi a tuah nain mi tam deuh nih cun an zum lo. Lamkaltu hna hmangin Thiang Thlarau nih khuaruahhar thil tampi a tuah nain mi tam deuh nih cun an zum lo. Atu zongah Thiang Thlarau nih Kkhrih Jesuh sunparnak le thawngtha biatak karhternak caah ram kipah khuaruahhar thil a phunphun a langhter ko nain mi tami nih an zum duh lo. Mi tam deuh nih zumh ruangah siseh zumh lo ruang zongah siseh, Pathian Biatak cu amah ningte a si ko lai. Amah ningte a si peng ko mi Pathian Biatak chung i kan i phum tikah kanmah tu kan hlawk tawn. Thiang Thlarau Thawngin a langmi khuaruahhar thil vialte nih cun Jesuh Khrih sunparnnak a pek i Pathian Ram a karhter zungzal. Ka bia a sau deuh, ka bia ka donghter chung rih lai.
Credit: Benjamin Khamh Bawi