Selena Gomez: Justin nih Hailey Baldwin hi a kal tak te ko lai

Justin Bieber le Hailey Baldwin cu an i um nak thla 8 a si cang nain phung ning tein thitumhnak puai tu cu an tuah rih loh. March thla ah khan tuah ding an rak ti nain Justin Bieber nih a ni a thawn than lengmang kha theih a si. Nai thla ah khan an nupa lawng in inn thar ah ai thial cang mi hna le nuam tein chungkhar a ser ti mi hna an si.

Justin nih Hailey zeitluk in dah a duh dawt tikha ca in a tial bantuk in Selena sin ah a kir than te ko lai tiah soisel nak bia a chim mi hna sin zong ah khan Hailey Baldwin lei in a tan ngai kha hmuh a si tik ah Justin nih Hailey hi a duh tak tak ko tikha zumh cio a si. Asinain Justin cu depression zawtnak a ngeih hnu in a lung hi a phun phun in ai thleng mi hna a lo than.

Justin nih a dawt tuk mi an nu cu nai hrawng an tlawn len nak tete ah i hlat ngai in an um kal nak kha fan tampi nih an van theih hna. Tahchunh nak ah May 6 ah an tuah mi Met Gala Fashion show puai ah Hailey Baldwin cu a mah lawng in a kal. Nikum Met Gala puai ah Hailey cu Shawn Mendes he an rak kal ti, cu puai an kal ni tlawmpal ah Hailey cu Justin he an i uar caah Shawn Mendes he an hmanthlak hna cu a delete than dih.

Mah ruang ah cun Justin nih a tukum ah a zulh lo nak hna a si sual hnga maw tiah fan cheukhat nih cun an ruah. Cu pin ah lam an kal ti zong ah ai hlat ngai in an kal kha van hmuh cio an si. Cu hnu i thawngpang a rak thang than mi cu Justin cu Selena he pehtlaih nak an ngei tihi a si. Justin nih a lungum bia a chim mi tu kha Selena nih a ngeih piak bia a si tiah Selena he ai neihniam mi pakhat nih The Radar Online media sin ah a chim.

Selena nih a hmuh ning le a ruah ning ah hin Justin nih nungak dang bantuk in Hailey Baldwin hi chikhat lawng a duh lai i, a kal tak te ko lai tiah a ruah nak zong kha theih a si. Justin le Selena pehtlaih nak an ngeih nak kong hna cu Hailey Baldwin nih a theih timi thawng pang zong a chuah cang tik ah an buai ngai ngai lai tiah ruah cio a si, nain Hailey Baldwin nih Justin cu a duh tuk caah a pawng tein a um hnawh peng ko lai ti kha zumh a si.