Nuva sinak thurhnawm tukin hman ruangah million renglo zawtnak thalo an ngei

Nuva sinak hman thatlo ruangah nichhiar minung million renglo nih zawtnak thalo le tihnung an neih tawn tiah hi bantuk lei buaipi tu WHO nih nilini ah khan langhternak a tuah. thurhnawm tuk le thlahdah tukin sex hmanlo ruangah chlamydia, gonorrhoea, trichomoniasis, le syphilis (nuva sinak hman thatlo ruang i zawtnak um mi pawl, lai holh cun an min ka thei lo)zawtnak hi nichiar minung million renglo bak nih an neih tawn.


Zawtnak cheukhat hna cu i ven khawh le fawite in damter khawh asi ko nain, zawtnak cheukhat Gonorrhoea le Trichomoniasis ti bantuk zawtnak ngeimi hna hi cu thlawpbul an har pinah fawite in a dam kho tilo. Zawtnak tihnung tak tak an si. mah ruangah cun nupi pasal ngei cang mi hna le, nunghak tlangval sex hmang duh mi hna zong nih mah bantuk zawtnak hi hrial khawh i zuam ding asi. Sex hman duh tikah thiangtein kan taksa tuah hmasa ding tiah an chim fawn.


WHO nih a langhter ning ah cun nu le pa kum 15 in 49 karlak hna cu kum 2016 ah khan chlamydia zawtnak in a zaw tharmi hna hi 127 million bak an si i, gonorrhoea in 87 million, syphilis zawtnak in 6.3 million, le trichomoniasis zawtnak in 156 million an si. Hi thil nih a langhter mi cu hi bantuk zawtnak hi fawi tein i chonh khawh asi. Hi bantuk zawtnak ngeimi na si ah cun a dam hlan lo sex hmang ti hlah.
Lai holh in hi bantuk zawtnak pawl fiangte in hei chim a har ngai i, Lai holh in a min a theimi hna kan um si ah cun comment leiah chimh khawh a si. kan chim ti hna lai.