Yangon Feh Motor Accident ah Zonuam Khawmi Pa Thawm Tin Thang Nunnak Liam

Tahan ihsin Yangon feh ding motor accident ah motor mawngtu Pa Thawm Tin Thang nunnak liam. Pa Thawm Tin Thang (Kum 57) hi Tahan-Letpanchaung line suai ringring a si. Yangon ih motor lei ding le license renew tivek pawl hlawh in a mawngsak theu. Tuitum khal Tahan motor Yangon ih license renew dingin an fehmi a si. Motor ah mi 4 an to ih driver cu sizung thlen hlan ah a nunak a cem. Midang 3 cu Bago Pyituh Sizung ah tuamhlawm rero an si.

Zonuam Mino Secretary Salai Tla Tlan in ” Accident cang hi tuizanlam 3:00 hrawngah a si. Pa Thawm hi zuk hmawm thamlo khawsung ih kan rinsan zetmi a si. An cangsualnak hi Yangon ihsin peng 30 hrawng an ti. Khawsung Mino hmalak dan ding kan rel rero lai” tiah a sim. “Pa Thawm motor in Crane a hrut tiah kan thei. Bago palik zung pan dingin Zonuam Yangon um pawl kan ko khawm aw rero” tiah Yangon ih um John Wright in a sim.

Credit: Cin Pak