Pi Chin Chin Pek Thang nih Ramchung ramleng ah um mi laitlai u le nau hna sinah cakuat atial

Tu lio kan ramkhel kong ah mah le ruah ning hmuh ning, kan ruah khawh tawk kan hmuh khawh tawk in ttial cio si le comment vun rel cun zan ah merem khawh si ti lo le kan ram ramkhel ka ton mi ( experience) le ka hmuh ning kan hrawm ve hna.

Chin miphun hi Pathian nih a kan dawt khun mi kan si. Miphun pakhat si nak ding ah Holh, Nunphung, Ca, Biaknak ti in umnak Ram te he khuasa mi kan si. A bik in Pathian a bochan mi zumtu khrih fa lawng te kansi. Mipum tu cun mi tlawm te kan si, a tu le bang hna cun ram thum nak ah kan fim ttha ttha kan mithiam ttha nih nan kan vaih tak dih fawn tik ah 2014 ah ram pumpuluk Census an lak le a tu kar ah Mipum in Laitlang, kawlrawn lei peng dang dang a um mi hi 100 ah 2% lawng kan si.

1. Chin miphun hi kan I funtom lo ah cun miphun tlau ding a fawi te kan si.

2. Khrihfa ram kan si, Kan Biak nak le kan ram hi Chinmi nih kan humhim a herh. A ho nih dah a kan hum piak lai?

3. Kum 70 leng Tlangcung mi hna an kan nekrawt, an kan hlen nak ruang ah hriamtlai in i kah nak kan ton mi cung ah Chin milawng si lo in Tlangcung mi vial te lungrual te in Dothlen nak kan tuah a cu rawh.

4. Remdaih nak ( Peace Process) Union Peace Dialogue ( UPDJC)le Union Peace Conference 21st Panglong Ramkhel I chawnhbiak nak ah kan duh zong ah duh lo zong ah CNF lawng hi Chin miphun caah a chimrel tu an si. Chimrel pi tu bawmchan tu Miphun Party an neih ve lo tik ah miphun dang hawi hna sin ah U le nau nei lo bang an thla a vaih caan a tam pi mah thil si ning hi ka hmuh ka ton mi asi tik ah ka mitthli a tlak caan a tam.

5. Parliament ah 2008 phunghrampi remh ding ah 45 committee an ser ih Chin pakhat hmanh an itel ti lo, Chin mi I tel ve lo in Phunghram an remh ding hi kan hna a tla kho cio hnga maw?

6. Miphun caah kan pianthar a cu cang Chin ram ah cun CNLD tha pe ding in i zuam hna usih. Tlangcung kan unau dang asi mi Shan, Karen, Kayah, Mon,Kachin le Rakhine hna zong Miphun party ah thazang i pe ding in an I zuam cuahmah ve hna.

Minung hi a hohmanh a tlamtling mi kan um lo, kan tlamtlin loh nak I huppheng hna uhsih.

Chin miphun kan si nak hi khaw zei kan phak zong ah a tlau lai lo, Tha kan I pek khawh lo hmanh ah I doh hna hlah uhsih law a bawmchan tu si ding I zuam chin hna usih.

Kan ram ah Remdaih nak kan hmuh ih Federal ram kan ser khawh nak ding le Kan Chin Miphun le kan Biaknak kan hum khawh nak lai lungrual te in I funtom zuam ko hna usih law.

Chin miphun a daw tu kan si dih a hohmanh hi Holhchia hmang lo te in duhsak nak tu in comment hna hi ttial khawh i zuam ko hna usih law.

Ca Ttial tu : Pi Chin Chin Pek Thang