Salai Lairamthang na bia ka van in leh– Vuancichoh kongah

Ka u Sungsung pa — article 261 an remh ahcun ramtthen ah ralkap le USDP fonh nih cozah an tlaih lai tiin na tial nolh than caah van i nolh ve ko ne rih ning . Capo zong van sai pah ko usih– zaangkhai tein.

Kan theih dih cio bang Hluttaw ah 75% hi mipi thimmi a si. 25% hi ralkap a si. Rampumpi Hluttaw zong siseh Ramtthen Hluttaw zongah siseh 51% (atambik) in cozah ser a si. 261 an remh ahcun ramtthen ah USDP nih 26% an ngah sual lai i ralkap le USDP kawmh in cozah an ser sual lai timi kha zubui thingpar kai in na kai ter ttheo tinak a si. Central zongah cubantuk cun USDP le ralkap ifonh in President an tlaih hkawh timi hi micheukhat nih an chim lengmang ko nain a si kho lo tluk a si kan ti. Cubantuk te cun tlangcung zongah a si ve ko dakaw.

Na chim ttheo. Kum 2015 thimnak lioah Shan ah USDP + Ralkap fonh kha majority an si kha teh tiah. Khakha cu article 261 ai remh lo ruang fam ahcun dawh “tlangcung party cu an tei zongah upadi nih cozah ser khawhnak lam a awnh lo” tiah NLD le USDP nih nan kan tuknak lila caah a si fam cuh. Cun 2015 lio kha cu USDP cozah tlaih lio si kaw Shan Pythusit timi People Militias pawl kha (Shan lawng bak ah phu 50 hrawng an um) dik lotuk in rian an tuanter hna, cu Commission zong nih vote an fir pinah “farit duh zongah vaking USDP tthiam cozah a si lai” an rak ti caah a si ko cuh. Khakha ‘avei thingfung tlaih in’ itleih peng ding si ti lo. USDP cu NUP bantuk an si ko le 2020 ahcun chim awk zeihmanh a um lomi si. Tlaangcungmi pawl kha seihchiah lo zongin i umter ding si lo.

Ka nolh tthan lai. Na pi le nih article 261 kan remhpiak hna seh; cutin state kip ah mahte cozah ser khawhnak nawl kan pe reng seh ca (level playing field siseh) tlangcung party nih (asiloah NLD he ikomh in) cozah kan ser hrimhrim ko lai. Article 261 remh ahcun USDP nih tlangcung ah 26% a ngahnak ding hrim a um ti lo i ralkap nih cozah tlaih ding kha awngkua virh chom ding si lo. Atucu article 261 cu pei nan kan remhpiak duh lo le cuchinchap ahcun nanmah lila nih ‘hi party pawl nihcun zeidah an tuah khawh lai, cozah zong an ser kho hlei ttung lailo’ tiah campaign ah nan kan nolh chih lila tikah cun mipi nih vote an kan pek duhlomi si ko cu. Atu boxing kan i thawnghning arena hi cu ‘khatlei pa a kut ttem i khatlei pa nih duhtawk in thawngh’ bantuk khi a lo . Zeitluk in dah a fair lo (so unequal footing)!

Ralkap le USDP kha riit-ttih ah thlai ti hlah uh kan ti cang kha! Arpi nih a fale kha “sahngar nih an seh sual hna lai” a ti le umpu chungah a erh hna i a voih a hnimhter peng hna bantuk in ralkap an ra sual lai tiin zeitiang dah sia ruah tuar in kan tuar rih lai