UNHCR nih Chin ralzaam chungkhar pawl an hrem hna caah lungre thei ngai in an um cang

Atu lio UNHCR boruak kong he pehtleih in hna ngam a si ti lo. Abik in Malaysia le India ah ralzaam dirhmun in ah um rih mi caah i ralrin tak tak a hau mi a si. Nai te ahkhan UNHCR nih ralzaam minung pa 5-6 hrawng hna cu zungah an auh hna. Laitlang ah voikhat tal na kir bal maw tiah biahalnak an tuah hna.

UNHCR nih an auh mi hna ralzaam Nu/pa pawl hna nih voikhat hman kan kir ballo tiah an leh ko hna. Nain, UNHCR nih laitlang an tlungnak hmanthlak pawl cu an vun zoh ter colh hna, ziah mah hihi nan mah nan si lo maw tiah an vun ti hna tikah lih le lih in biachim awk an tha ti lo.

Cu tin, UNHCR nih a auh mi hna pawl chungah embassy lei zong nih an rak auh colh ve mi hna an um. UNHCR nih biahalnak an tuah mi hna ning tein biahalnak an tuah ve hna pinah an hmanthlak pawl tiang an zoh ter chih rih hna.

Hi kong he pehtleih in Malaysia le India ah ralzaam dirhmun in khua asa cuahmah lio mi nan si ahcun laitlang nan tlung kal nak hmanthlak tar kha iralrin cikcek rih nan hau. Minung pakhat ruangah ralzaam thong tampi harnak ton kho a si.

Abik in online Facebook, Viber, What-apps, le Instagram pawl sinah nan hmanthlak tar kha i ralrin a hau mi a si. Ralzaam tampi nih UNHCR Facebook page like le follow tuah cio asi tikah fawi tein UNHCR nih nan i cawlcangnak tete kha an i thei kho hna ti kha philh hrimhrim hlah uh. 2021 ah UNHCR nih ralzaam status review an tuah than ahcun ” Negative impact” tampi a chuah ter kho mi a si.

Hi cunglei ca kong he pehtlaih in atu lio Australia le Canada ram ah a kal ding Chin ralzaam chungkhar zei maw zat cu UNHCR nih exit permit tuahnak ding ca a pek duh hna lo caah mi cheukhat cu an Flight Ticket an cawk cia mi tiang an sungh cang. A cheukhat nih mitthli he UNHCR zungah an va nawl hna hnu ah exit permit tuahnak ding ca an pek hna. Hi hnu zongah mi tampi UNHCR nih an hrem rih men hna lai zumh a si.