Hlawhhlang Rian Ttuan Dingin Zuar Timhmi Nu Ngakchia Minung 17 Hna Cu

Zuar le hramhram in kutdawk rian an ttuanter mi hna Cambodia le Vietnam rammi ngakchia minung 17 hna cu Thailand ram anti-human trafficking phu hna nih Thailand ram Patong peng Phuket khua ah an va chanh hna.

Hi ngakchia nu 17 a tlunkal pi tu hna le a umpi tu hna Thailand rammi nu Ngo Sun le Cambodia rammi pa Suphattra Charoensuk zong mi cawkzuar nak case in tazacuai an si i rianhrang ttuan in kum sau thong an tla lai tiah theih asi. Ngakchia minung 17 hna cu Phuket khua ngakchia zohkhenhnak ah an chiah chung hna lio asi.

Thailand ram nawlngeitu hna nih ngakchia pawl hi zeitindah Thailand ram luhpi an si timi an dothlat an tuah cuahmah rih. Hi thil palik nih an theih khawh ning hi a liamcia thla tlawmpal ahkhan misual phu pakhat nih sex sal ah an zuar mi nu pakhat a zaam kho. Cu nu thawngpang pekmi thawng in palik nih hi ngakchia pawl an khamh khawh hna le mizuar tu pahnih an tlaih khawh hna hi asi.

A rak luat mi nu nihhin Thailand ram Persons peng Anti-Trafficking phu hna sinah bawmh a rak hal colh hna tiah palik bawi Lt Gen Jaruwat Waisaya nih a chim. Hi misual phu nihhin an tlaihmi hna pawl hi a cheu cu hramhram in hlawhhlang rian an ttuan ter hna i a cheu cu lampi ah kutdawk rian an ttuan ter hna. A cheu cu hlawhhlang rian anmah tein an i thim i a cheu tu cu rianttuan an i thim ve hna tiah palik nihcun an chim.

Hi hna pawl hi inn le rawl lawng an pek hna i thla hawlh tibantuk fangkhat hmanh an pekmi hna a umlo tiah palik nih an chim chap. A tam deuh cu kum 15 tang nu tete an si hna tiah theih asi. Nikhat i baht 3000 tal an chuah pi khawhlo ahcun an tuk an velh hna i a phuphun in hremnak an pek hna tiah theih asi. Source:Thephuketnews