Phanah Danh Awk Te Hmanh A Ngeilo Mi Siangngakchia Pa Thil Tuah Nih Mi Tampi Thinlung A Tongh

Phanah danh awk te hmanh a ngeilo mi Philippines rammi siangngakchia pate pakhat nih an dum chung chuak mi banhla te cu a saya pa laksawng a pek. Hi siangngakchia pa hi a min ah Manuel ti asi i a konglam cu chikhatte ah a hun laar colh.

Hi pa te konglam hi a saya Ryan James Duenas nih a rak ttial mi asi i a siangngakchia pa le a laksawng nih a thinlung a tonghtuknak kong zong kha a rak ttial chih rih. Ryan James ttial ning ahcun a siangngakchia pa Manuel hi tlai deuh ah sianginn a rak phan i zakzum in sianginn khan innleng ah a dir tiah a ttial.

A siangngakchia pawl nih Manuel a phan cang tiah an saya pa Ryan cu an hun chimh i an sayapa nihcun sianginn khan chung ah a luh ter. A sianginn khan a luh le cangka Manuel cu a bag chung thil ah a hun buai ngai i a bag chung ummi thil cu chuah a hun zalh len.

Siangngakchia pa Manuel nihcun a zal chung cun banhla a hun chuah thluahmah hna. Cu hnuah a saya pa Ryan cu a va pek. Ngakchia pa Manuel nih tlangcung mi le khuate fa sifak te asi nain a saya pa nih thleidan lo tein ca a chimh ve ruang i a lunglawmhnak a rak langhtermi kha asi.

A saya pa Ryan cu ngakchia pa thil tuah nih a thinlung a tongh tuk i ngakchia pa caah santlai si hram seh tiah kedan tuah khat a cawk piak ve.

Phanah loin sianginn a kai lengmang ve mi Manuel kedan thar te he sianginn a kai kho ve cang lai. Dawtnak a hmete midang cung langhter khawh hi zapi kan caah a herh ngaimi thil asi ve. Source:RJ