Rawchok Ral In A Runvennak Hna Ah Nau Pawilio Uico Pakhat A Nunnak A Liam

A ngeitu chungkhar hna luh hnawh a timtu hna rawchok cu nau pawilio uico pakhat nih luhter sianh loin inn hmai ah a seh ve. Hi thil hi Thailand ram Pathum Thani peng ah a cangmi thil asi i kan hnulei February 18 ahkhan a cangmi thil asi.

Chungkhar hna nih kum 2 minung an uico Nong Horm cu an inn hmai kaa ah pe 4 tluk a saumi rawchok pakhat he an ruak in an hmuh tti hna. Hi uico Nong Horm tiah min an pek mi hi fa a hring dengmang cangmi asi i nau 10 hrawng a pawi lai tiah zumh asi.

A hmur kam hrawng rul cuhnak hliamhma tampi he a thimi uico ruak pawng ahcun uico ngeitu Buncherd Praprom kum 35 cu aa bual i lungkuai in a ttap ve. Hi rul hi rawchok phungkhat asi i a sivai ttih a nung taktakmi asi tiah theih asi. Buncherd Praprom a upa Suriyon Chanthakhet kum 51 nih an uico Nong Horm cu anmah chungkhar bantuk taktak asi cang nak kong kha a rak chimphuan.

Suriyon nih “rawchok ral in kan chungkhar a kan runvennak ah a nunnak a liam. Ka lung a kuai tuk hringhran. Kan ca i temhin nak le fahnak a tuar mi ka ruah piak chun tikah ka thinlung a kekkuai dih” tiah a chim. Suriyon nih an innleng leiin thawngpang a theih nak kong le a va chuah hnawh tik ahcun an uico khamh ding a tlai cangnak kong zong kha a rak chimphuan chih rih.

Suriyon nih “zei ko hen na cang ka dawt, nau na pawilio theng na nunnak a liam caah ka ngaih a chia tuk hringhran” tiah video chung ah an uico cu ttah hla a lawh. An uico a khamh manhlo ruang zong ah amah le amah mawh aa phurh ter rih.

Hi rawchok zong hi uico sehnak hliamhma ruangah caan rau lo te ah a nunnak a liam ve. Chungkhar hna nih an uico Nong Horm cu an inn hnulei dum chung ah an vui. Suriyon nih “Nong Horm hi kan chungkhar kan i cawmmi sattil hna lakah a ttha bikmi uico asi. Kan chungkhar caah zumhawktlak asi i kan caah a nunnak tiang a pek” tiah a chim.