Chin State Complete Lockdown kan Tuah Colh a Hau

Chunmang zong i kan imanh ballomi thil kan Tulio zawtnak tihnung Covid-19 cu kan lai tlang lila zong ah a phan ve cang. A poi tak tak ti pin chim awk a um ti lo. Zahan khan Kawlram cozah ngandamnak lei branch Ministry of Health and Sport lei nih thawng fiang tein an van langhter cang.

Kawlram ah fiang tein theihmi Covid -19 zawtnak a ngeimi minung 2 an um tiah a langhter. Pakhat hi Yangon ah hmuh a si i pakhat deuh hi Lai tlang Tidim ah hmuh a si ve. Lai Tlang (Chin State) ah hibantuk tiang kan phanh hi khuaruah lo awk a tha ti lo. Atu dirhmun ah cun lam 1 lawng i Thim ding kan ngei cang.

Kawlram – Kalay lei in a lut dingmi thil vialte minung an si ah mawtaw an si an kham dih an si cang. Mizoram lei ramri hrim hrim ah luh a ngah lo. Ei le din ah kan mah tein kan i nung kho lai maw ti ruah ding a tam. Cun hi zawtnak a karh tuk nak h nga lo khua kan ruah cikcek a hau cang. Cucaah hi zawtnak Covid-19 kan kham khawhnak ding ah cun lam 1 lawng a um. Cucu Complete Lockdown a si. Chinram minung vialte ri khiah nei loin Lock Down kan tuah colh a herh. Minung hrim hrim leng chuah lo. Dawr vialte khar dih kan hau. Minung mibu umnak crusade le camping tibantu tiang kan ngolh dih a herh. Complete lockdown hi kan tuah lo ahcun hi zawtnak tihnung ruang ah minung nunnak tampi an liam lai. Complete lock down hi cozah lei nih an kalpi zok lo ahcun thil poi tam tuk a phan kho. Asinain tha tein le nawlngai tein kan um ahcun hi zawtnak hi sau a um hrim hrim lai lo. A tlau colh lai.

Zeizong vialte kham dih , minung lut chuak lo i hren dih hi complete lock down ti cu a si. Tuluk nih an kalpi cang. Minung tampi a kham manh. Italy le vawleicung ram vialte nih an kalpi cuah lio a si. Mizoram kan inn pa hmanh nih minung 1 hmanh case an hmu rih lo nain complete lock down hi an tuah peng cang. Chin State cu State of Emergency phuan i Complete Lock Down hi a tuah colh a hau.
Credit: Salai Kawltu