Dawtnak Tak Cu Harnak Caan ah a lang

Mi zei poah hi vanchiatnak le puicimnak ton kan duhlo nain kan hrial lho bak fawn lomi vawlei nih a chuahpi mi a si. Kan duhlo buin har kan ton i kan duhlo buin vanchiatnak kan ton tawn. Zumhnak kan sinak a muru dawtnak kan ngeihmi cu thatnak le hlawhtlinhnak a um caan ah si loin tu bantuk lungretheih le thinphang in kan um lio caan dawtnak tak tak kan ngeihmi cu kan langhter awk a si.

Kum 2015 Hakha puicimh lioah lam vialte a rak pit doh tikah dawr thil phawr khawh a si ti lo i facang cawk awk a rak har ngai. Cu lio thengte ah chawlehchawhrawl a tuahmi hna caah caanttha ah i lak zau in facang man an kaih tikah zuartu caah cun a miak i a hlawk ngai ko nain ei awk ngeilo le har in a um mi hma caah har chinchin nak a rak si. Cu an facang man kai mi cu mirum nih cawk loin sifak santlailo ei awk ngei lomi nih cawk a si. Zuartu sinah phaisa cu a tom in a lut ko nain cu phaisa cu mitthli he dawr ngeitu Phaisa bawm ah aa ciah.

Tukum 2019-2020 ah kan duhlo bik le kan tih tukmi zawtnak COVID 19 cu hrial khawh loin mirum he mi fimthiam le mi lianngan zong hrial loin vawlei cung a kan den cio. Ramchung ramleng luhchuah an phih thluahmah tikah Dawr ngeitu caah caanttha laknak ah an hman cio. Kanmah lawng si loin ramdang hrim zong an thil man an kai tthulh thluahmah . Cu zawtnak cu kan zamtak khawh lo bantukin Laitlang a hung phan deng cang ti theih in luhchuah an hung phih hlan in kan thil man kan facang man a kai colh tikah Dawr ngeitu cu vantthat ah an i rel lai nain sifak ngaichiattertu an si kha an philh sual rua hlah maw ti ka ruat ngai ngai. Ei awk ngeilo pawl hi mirum an silo caah sifak deuh an si bangin thil man a kai tikah cun sifak pawl caah a har chin chin i Dawr ngeitu caah nihnak bantuk ah a cang. Cathiang nih a kan cawnpiak mi cu ” ka rawl a ttam i rawl na ka pek, ka ti a hal i ti na ka pek, aih awk puan na ka pek” a ti bangin nihin ah ei awk din awk a ngeilo mi kan hawikom le kan miphun hawi sinah bawmh khotu kan silo hmanhah kan thil man amah ningkel tal in kan zuar kho hnga lo maw? Dawtnak kan timi hi mirum sinah le mitha sinah le dawtu sinha le hlawhtlin caan lawngah si loin hi bantukin kan ruahlo harnak le lungreitheih caan ah bawmh hi dahkaw Dawtnak tling cu a si cu.

Ka Miphun hawi hna kan tonmi lungretheih le harnak ah caanttha naa lak sual ahcun hmailei kan lamthluan hi khua awng kan pemh kho lo sual lai dahkaw. Mi harsa le sifak rethei mi sinah mumal ngeih le ningcang tein na tuahmi hi sertu Pathian nih an hmuh ko. Miphun khat kan sinak le Khrihfa kan sinak langhter in tu bantuk lungretheih le harnak caan ah Dawtnak langhtertu zumtu tha, khrihfa tha si i zuam hram ko u sih.

Note : Hi ca ka tial tikah ho ti hnawh um lo i pumpak siaherhbia sawh si caah thinhunnak le huatnak ah lak hin lo tein Dawtnak hi zei tik caan ah hman ding a si timi tu kha fak deuh in a kan ruahtertu si hram seh ti duhnak he nan ka relpiak naklai Khrih min in kan nawl/ sawm hna.
Credit: Salai Pa Thawng