Face Mask An Hman Ruangah Australia Khuasa Asian Ttafar Hna Velh An Tong

Australia ram khuasa Chin mi hna zong i ralrin ngai a herh ve cang. Anaite ahkhan Australia ram khusa Vietnam rammi nu pakhat le a ttapa cu Covid-19 zawtnak kongkau ah nanmah ruangah asi ti sualpuh in velh an tong.

Hi Vietnam nu hi Amber Mai ti asi i Australia ram Sydney ah ca a cawng lio mi asi. Amber langhter ning ahcun a ttapa he tlanglawng cung velh an tonnak hi face mask an rak hman ruangah asi tiah a rak langhter.

A veltu pa hna hi Australia rammi asi i a velh pah hna ahcun “nan ram ah va kir uh” a rak ti rih hna. Amber nih “hi pa nihhin bia chiakha phun kip in a kan ti. Bia kan i al i a dinmi a thlum hang cu a rak kan cheh hnawh pinah keimah zong thongh a ka timhrih” tiah a facebook ah a rak ttial.

Amber Mai a Vietnam min hi Phuong Anh timi asi i “nan ram ah va kir uh a kan ti rih. Hibantuk nehsawh ka ton hi ka voikhatnak asi” tiah Amber nihcun a facebook ah a rak ttial. Amber Australia ram a phanh hi a liamcia kum tlawmpal ahkhan asi cang i a ttapa tu hi Australia ram a phanhnak thla 4 hrawng lawng asi rih tiah theih asi.

A ttapa nih a runvennak kong zong cu “a voikhat nak ahcun zeihmanh bia kan al duhlo ruangah a thin hung i a dinmi a thlum hang a kan cheh hnawh. Ka ttapa zong nih a ttih tuk ve. Keimah a ka khenlo nak hnga lawng kha a ka runven. Nam le chuih ka timh ve nain kei cu ka hme i a nih cu a ngan” tiah a facebook ah a rak ttial.

Cuka tlanglawng chung ahcun Australia rammi mi tampi an um ve ko hna nain zei rello an zoh sawh men ko hna. Cu hnuah tlanglawng mawngtu an auh i cu pa nihcun a men men in a rak tthen hna.

Amber nih “ngaihchia ngai asi mi thil cu tlanglawng in zaam kho hlah seh tiah kan tlaih ahhin ahohmanh nih a kan chuah hnawh duhlo mi hi asi. Mipi nih an kan bawmh len lai tiah ka ruah nain a ruang an theihlo ruang le biapi tuklo i an chiah ruang maw asi hnga an kan bawm duh baklo” tiah Amber nihcun a rak ttial chih.

Hi thil nih a ning a zak ternak kong zong Amber nihcun a rak ttial chih. A chungkhar pawl Australia ram aa dawhnak le a tthatnak kong a chimh tawn hna nak le cu ruang i a ttapa sianginn kai dingin a nu le a pa nih Australia ram an rak thlahmi asi nak kong a rak langhter chih rih.