HOLHTHEIHLO DABATE TUAH DING IN PAHNIH NIH AN KA CHALLENGE CANG

Coronavirus kong lawngte kan rel hna ahcun kan lung a mih cang lai caah holhtheihlo kong van I ruah tti hna usih!

Keicu Laimi hi ka dawt ngai hna tiah kai ruah. Keicu Laimi hi ka tlaihchan ngai hna. Holhtheihlo ka doh hi Laimi kan dawt hna caah asi. Holhtheihlo dohnak kong hi miphun dang holh in ka ttial bal lo. Zeicatiah Laimi tlukin ka dawt khawh hna lo caah asi. Kei nih Bible study ka tuah ning ahcun holhtheihlo hi nan lih bak in nan holh tiah kan hmuh hna. Bible hmun tampi ah chirhchanh ka ngei dih. Cucaah holhtheihlo a pommi cu bia I ruah ding in open challenge kan tuah lengmang hna.

Asinain minung pahnih lawng nih debate cu nan duh. Asinain an debate tuah timh ning hi ttihnung asi. Thlarau nih holhtheihlo tiangin a ka peek ai ti ding cu nan si hrimhrim lo. Nan debate tuah duh ning hi Pathian huat zawng taktak asi. Debate kong a ka challenge mi pahnih an um I cu hna nihcun:

(1) Pakhat cu Van Zang khuami asi. Anih nih a duhning ahcun Bibel I I ruah khi a duhmi asi lo. Kan buainak hi Bible in I fianh ter kha a duh lo. Pathian hmai ah chiatserh in thla kan cam lai I holhtheihlo hi Thlarau thilpeek ah a hmanmi asi ko ahcun na thi bak lai. Thlarau thilpeek asi lo ahcun ka thi bak ve lai ti hi a debate tuah duh ning asi. Pathian nihcun kan pahnih in a kan thih ter bal lai lo ticu a fiang. Chiatserh in bia I kam cu Pathian duhmi zong asi lo. Chirhserh biakam a zum rihmi Khrihfa nih cun Thlarau thilpeek zong cu an dong taktak hnga maw ti kah ruah awk ngai asi.

(2) Holhtheihlo debate a kan challenge tu adang pakhat cu Evangelist pakhat asi I Hakha ah ummi ka si a ti. Anih nih cun Hakha hlawhtlin thlacamnak (Hereb thlacamnak) thlang ah nunnak thap in ni 40 veve thla kan cam lai I holhtheihlo hi a dik ahcun nang na thi lai I holhtheihlo hi a dik lo ahcun kei ka thi ve lai tiah a ti. Ni 40 cu rawl ul veve sih law, kan pahnih bak in kan thi hnga.

Paul kha zumhnak kong debate an tuah ahkhan chiatserh biakamnak an rak tuah bal maw? Jesuh le Sehtan Bible an rak I el ah khan chiartseh biakamnak an rak tuah bal maw? Chiatserh biakamnak tuah hi Pathian duhmi teh asi maw? Zumtu ttha nih kan hman ding asi maw? Kan zumhnak a dik le dik lo I fianhnak ding caah Bible maw kan hman deuh lai, chiatserhnak dah? Pathian cu khua zei poh ah ai phuang dihmi asi. Horeb thlacamnak tlang lawng hna Pathian ai phuannak I kan ruahmi hrimhrim nih kan zumhnak hi zeibantuk kan si kha a langh ter.

Atu ahhin vawlei ka nunnak hi dong sual sehlaw, holhtheihlo a doh ruangah asi tiah a ka ti dingmi minung an tam tuk. Asiah holhtheihlo a holhmi zong cu an thi ve lo maw? Holhtheihlo nan holhmi zonghi Bible an rak ttialnak holhhram asimi Greek Bible ah a um lo. Kawl Bible zongah a um lo. Bible ning loin holhtheihlo in nan holh bantukin debate tuah nan duh ning phunglam zonghi Bible ning lo tthiam asi.

Bible cu Bible in I fianh phung asi. Nan nih cu Bible hi Lai Phung in fianh nan duh. Holhtheihlo a dik le dik lo theihkhawhnak caah vawlei ei hna nan ka sawm te men lai! Bible ning I a kal lomi he debate tuah ka duh lo. Nunnak thap in debate tuah phung asi lo. Keicu holhtheihlo a ngeimi an thih hi ka siang hna lo. Bible ning loin an kal ko zongah ka dawt tuk hna.

Holhtheihlo ka doh hi kan dawt hna caah a si.

Credit-Aung Mint Thang