Mithi Ruak Vuinak Kong Ah A Buai I Pakhat A Thi Chap (+Video)

Ayeyarwaddy ramthen, Gyonepyaw myone, Zinpyunkung khua ah nihin 2020 March 25 ni zinglei sangah mithi ruak phum ding in an kalpi lio ah police nih lam an kham hna caah police le khuami kar buainak a chuak i police nih an meithal an puak hnawh hna. Police meithal puakmi nih khuami mipa 1 a nunnak a liam le phungki 1 hliamhma a tuar tiah theih a si.

Hi khua an buainak hi tu lawng siloin an buai tawnnak khua a si ti si. 2017 kum thok in a buaimi a si i tu bantukin an buai hi voi 4/5 a si cang ti si. An khua hi then hnih in an i then i khat lei le khat lei an i rem lo. An khuabawi pa nih mithi ruak phum tikah an kalpinak ding lam a tuahpiak hna.

Nain khatlei mithi khua nih cucu an zulh duh lo i khatlei khua nih an khua ah an tanter duh ve lo ti si i khuabawi nih nan kalnak an tuahpiakmi ah nan kalpi lo tiah an buai hna. Cu ti cun an buai thok i nihin tiang an i rem kho lo. Khatlei nih mithi a ngei tikah khat lei nih an khua chungin an kalter duh ve lo caah an mithi cu video chung kan hmuh bang in lam cungah an chiahta i police le meithattu hna nih an vui piak tawn ti si.

Nihin buainak zong cu bantuk thiamthiam in khatlei mithi a ngeimi hna nih khuabawi tuahpiakmi lam in kalpi duh loin, khatlei khua hna nih le an khua chungin an kalter duh ve lo caah an buai i minung pakhat a thih phahnak hi a si. Mithi ruak an kalpi cu lam cungah an chiahta than i police nih an lakmi video chung hmuh khawh a si.

Source: Ayeyarwaddy Times
Credit: Ca Hlun