Philh Um Lai Lo

2020 March 23 in Covid-19 Kawlram le Kan semnak Lairam a phan ve. Sawm lo in a ra mi zawtnak nih mithlakok baar in ningtti in a kan tuah. 2020 March 24 (Nihnih Ni) in Chin Ramkulh Cozah nih mibu tonpumhnak le biak pumhnak paohpaoh tuah rih lo ding in thawng a kan thanh. Ralrin hi kan himnak caah a ttha bik lam pakhat a si.

2020 March 25 (Nithum Zan) pumh cu a bu in i pumh awk a ttha ti lo. Khua ka ruah ah ka thinlung zeitindik ai nawnnok. JMBC nih voidang nithum zan ah block 21 ah sunglawi tein Pathian kan thangthat tawn mi kan tuah kho ti lo. Philh awk a ttha ti lai lo.

Kan chungkhar in nithum zan pumhnak cu kanmah chung lawng kan tuah. Minung pali kan si. Keimah; ka fanule pahnih le a nu kan si. Chungkhar pumhnak hi kanmah si khawh tawk in kan tuah lengmang nain tutan pumhnak kan tuah cu ka thinlung a phun ai dang.

Kum 8 a si mi ka fanu upa deuh Miriam nih; ‘Ka pa; keimah chan ah maw atu virus zawtnak hi a chuah’ tiah a ka hal. “AW” tipin ka let ti lo. Ka fanule zong voidang kan i pumh an lo lo. Nawl an ngai khun.

Thoknak ah thla ka cam khawh in thawhlawm peknak kan nei. Kum 3 le cheu ka fanu hniang Velchin nih thawhlawm a kan kholh i “Ka neih vialte pe hmanh ning law laksawng a tam tuk bal lai lo…” ti mi kan sa.

Velchin nih Efesa 6:1 “Ngakchia hna nan nu le nan pa bia ngai hna u…” ti mi Baibal a rel.

Kan dihlak in Salm 121 reltinak kan nei i kan i lawm ngaingai. Baibal relnak kan neih hnu ah chungkhar ca; vawlwi pumpi zawtnak ca le Paletwa ralzaam kan miphun hawi ca ti in thlacamnak ka ngei. Ka mitthli a tla.

Biakinn ah pumhnak darkhing a rin lo le nithum zan sang le block pumh a um lo tikah hin Khrihfa tampi nih daithlannak ah kan hman sual lai ti ka phang. Atu caan hi chungkhar biakttheng le pulpit biapi in kan ruah khun caan a si awk a si. Kan inn hi kan Bethel a si khun caan a si.
Ka philh kho ti lai lo.

Lian Chawn
2020 Vaute 26