Ramdang Tlung Ka Si Tiah Aa Phorhlaw Ngaimi Nu Pakhat Covid-19 Lunghrinh In Khualeng Ah An Chuah

Pinlaybu Myone Nawngmoe Gyi Auksuh Naung Yin khua ummi kum 27 minung nu pakhat cu taluk ram in a rak tlungmi ka si tiah khuachung kenkip lo ah aa chawk i mipi cu a chawrh hna. Curuangah an khuami dihlak lungtling in khualeng ah hi nu hi um seh tiah an khuabawi pa cu an chimh.

Hika khua mi nihhin ramdang rian a va ttuan cu an ram theih ko nain a va i hlawhfa nak hi taluk ram a si an rak thei lo i minu nih a chim hna hnu lawng in taluk ram in a rak tlung mi asi kha an theih chom. An khua a rak tlun hi march 12 ah khan a rak si i cuti taluk ram in a rak tlun an theih hnu cun khualeng ah an rak um ter hi a si.

Hiti khualeng an chuahnak hi aa phorhlawt ruang deuh ah hin a si. Khoika in a rak tlun cu a mah tein khuachung ah aa chim i aa phorhlawt ruangah khuami hna zong nih an ttih pinah an rem lo pah zong a si kho men. Cu ruangah an khua si lei sayamah sinah thawng an va thanh i khualeng ah chuah hi asi tiah an khuabawi pa nih cun a chim.

Hi hna khua thawngpang an khua pawng ummi khua dang pawl zong nih an theih i an ttih caah na cuka khua lei cu an rak panh ngam ti hna lo. A zungzal in cun a si lo nain si sayamah nih a check lio a si i cu chungte cu khualeng um ding kan chimhmi tu a si tiah an chim tthan.

Ka theih tawk tein ka zohkhenh lio ahcun a ngan a dam ko . Ni khiahmi caan tiang cu innchung innleng chuah lo ding cu ka chimh ko tiah si sayamah Daw Thandar Soe nih a chim.

Mah minu cu an khualeng nel thlam ah ni tlawmpal a umhnu ah an khua in a chuak tiah an khua mi nih cun an chim ve.